काठमाडौं । २०८३ असोज १३ गते। नेपाल प्रहरीले देशका विभिन्न स्थानबाट अवैध लागूऔषधसहित २३ जनालाई पक्राउ गरेको जनाएको छ। प्रहरीले कञ्चनपुर, मोरङ, सुनसरी, कैलाली, बाँकेलगायतका जिल्लाका विभिन्न स्थानबाट उनीहरूलाई पक्राउ गरेको हो।

प्रहरीका अनुसार कञ्चनपुरको कृष्णपुर नगरपालिका–९ पिपरियाबाट खैरो हेरोइन जस्तो देखिने पदार्थ ७ ग्राम १९० मिलिग्रामसहित ३४ वर्षीय अनिल राना र २२ वर्षीय हरि राम राना पक्राउ परेका छन्। उनीहरू मोटरसाइकलमा सवार रहेका बेला प्रहरीले नियन्त्रणमा लिएको जनाएको छ।

त्यस्तै, मोरङको रतुवामाई नगरपालिका–५ कसेनी चोकबाट ब्राउनसुगर जस्तो देखिने पदार्थ १९५ मिलिग्रामसहित दुई जना पक्राउ परेका छन्।

सुनसरीको धरान उपमहानगरपालिका–१९ बाट करिब ५ ग्राम २७० मिलिग्राम ब्राउनसुगर जस्तो देखिने पदार्थसहित ३० वर्षीय मनिष योगी पक्राउ परेका छन्। प्रहरीले उनको कोठा तलासी गर्दा उक्त पदार्थ फेला परेको जनाएको छ।

सुनसरीकै इटहरी उपमहानगरपालिका–१२ खनारबाट खैरो हेरोइन जस्तो देखिने पदार्थ ३२० मिलिग्रामसहित दुई जनालाई पक्राउ गरिएको प्रहरीले जनाएको छ।

कैलालीको धनगढी उपमहानगरपालिका–१ बाट ब्राउनसुगर जस्तो देखिने पदार्थ ४०० मिलिग्रामसहित पाँच जना पक्राउ परेका छन्।

यस्तै, बाँकेको नेपालगन्ज उपमहानगरपालिका–१९ कन्ठिपुरबाट ब्राउनसुगर जस्तो देखिने पदार्थ ३ ग्राम ४५० मिलिग्राम र नगद रु. ७ हजार २३० सहित ६ जना पक्राउ परेका छन्। पक्राउ पर्नेमा घनश्याम बुढामगर, किरण ओली, बबिराम रोका मगर, चक्रे विक, महेश मल्ल र राजेन्द्र कुमाल रहेको प्रहरीले जनाएको छ।

प्रहरीले देशका विभिन्न स्थानमा लागूऔषध नियन्त्रणका लागि भइरहेको अभियानअन्तर्गत उनीहरूलाई पक्राउ गरिएको जनाएको छ। पक्राउ परेकाहरूमाथि सम्बन्धित कार्यालयबाट आवश्यक अनुसन्धान भइरहेको नेपाल प्रहरीले जनाएको छ।

मिति: २०८३ असोज १३ गते (सेप्टेम्बर २९, २०२६)
स्रोत: नेपाल प्रहरी

जनसमाचार नेपाल